مش عارفة ايه موضوع الحنين للماضي الي عندي بقاله كذا شهر دة ، بحّن لكل حاجة قديمة في الخمستاشر او العشرين سنة الي فاتوا ، بفتكرها و بستعيد احداثها و ظروفها و حواديتها و طبعاً ناسها ، مش عارفة ليه الحالة دي ، كل ما دماغي تروح لفكرة تبقي من حاجة زمان اياً كانت ايه هي ، اماكن ، مناطق ، مصايف ، خروجات و اغاني .
القاسم المشترك بين كل الاغاني دي حاجتين اولهم انهم كلهم اغاني بحبها و انها اغاني طلعت ايام نجوم الكاسيت ، قبل ال CD و ال MP3 و كل الحاجات دي ، دي اغاني الكاسيت بتاع زمان الي لما كان يطلع منه الشريط نلفه بقلم لحد ما ندخله في مجراه تاني ، و كان الي عنده كاسيت ب٢ شريط دة معدي ، و لو بقي كمان عنده Walkman يبقي trendy و in جداً.
محمد فؤاد و ساعات بشتاق ليوم عشته وانا صغير، لشكلي قبل ما اتغير، لايام فيها راحة البال عشان كنا ساعتها عيال . الاغنية دي فيها القصة النوستلچية من الالف الي الياء ، بحبها اوي و تأخذني الي حنين افتقده.
و موعداني وطال الانتظار و سايباني و في القلب نار و بحلم بيوم يعود النهار يعود النهار.
الوقت دة كمان كان فيه مسلسلات كتير حلوة و تتراتها اغاني رائعة ، الشهد و الدموع فاكرين اغنيتها : تحت نفس الشمس و فوق نفس التراب ، كلنا بنجري ورا نفس السراب .
و اغنية ابو العلا البشري : متمنعوش الصادقين عن صدقهم و لا تحرموش العاشقين من عشقهم ، كل الي عايشين من البشر من حقهم يقفوا ويكملوا ، يمشوا ويتكعبلوا .ويتوهوا أو يوصلوا.
و في نفس المسلسل كان في اغنية تانية رائعة : لو مش هتحلم معايا مضطر احلم بنفسى . لكنّى فى الحلم حتى عمرى ما هأحلم لنفسى.
و تتر مسألة مبدأ : كل الجروح ليها دوا يا طير يا حايم في الهوا ،اطوى الجناح على اللى الجراح ،أنا مش حابيع الصدق بالأكاذيب ولا أقولش للحمل الوديع يا ديب ولا أقولش للديب يا أعز حبيب .
التيترات دي موسيقي رهيبة لعمر خيرت و عمار الشريعي فتحس بأحساس يهزك من وقع الكلمات و الموسيقي المصاحبة لها.
الصراحة علي الحجار مع اني مش من معجبيه اوي بس غني شوية تترات و واغنيات زي لما الشتا يدق الببان و اغنية بحبها جداً مقدمتها رياعية من بتوع عم صلاح چاهين اسمها انا الي بالامر المحال اغتوي .
ولا حميد الشاعري دة في حتة لوحده ، في سكوت و اجيلك من ورا الاحزان و الفستان الاسود و طبعاً انا مهما كبرت صغير انا مهما عليت مش فوق ، مهما الايام تتغير منستش ان انا مخلوق ، مخلوق طيب بالفطرة عايش في الدنيا لفترة و الفكرة تاخدني لفكرة و الخير و الشر فروق.اغنية فيها مجموعة كبيرة غنوها و نزلت لوحدها single و دة مكانش العادي اوي ساعتها.
نيجي بقي لأتنين مرتبطين عندي ببعض ، منير و احمد منيب ، المريلة الكحلي و صوتك و يا وعدي علي الايام و صدقني يا صاحبي و طبعاً دايرة الرحلة و الحب ليه صاحب .
عامر منيب ، مغني مش كل الاجيال عارفاه لانه مات صغير ، بحب اغنيته جيت علي بالي من كام يوم ، مش معلق معايا غيرها.
الفترة دي كانت فترة فرق موسيقية مصرية ، الفور ام و الاصدقاء و المصريين ، كنت بحب اخر اتنين اكتر و اغنيتهم الحدود و تحت العشرين و ماشية السنيورة.
مدحت صالح و كوكبه التاني الي كلنا عايزين نروحه او نبقي المليونيرات معاه هو و شريف منير .
في التمانينات كان في اغاني اطفال احبها جداً و بسمعها لدلوقتي، بكار و اغنية ريمي بندلي ، اعطونا الطفولة و اساسي بيتك يا عصفورة وين ما بشوفك غير بتطيري، ما عندك غير جناحين، حاكينا كلمة صغيرة، لو سألونا بنقولن، ما حاكتنا العصفورة ، دي اغنية Bola Bola الي طول عمرها معروفة بأغنية العصفورة.
اغاني افلام اشتهرت في اوائل التمانينات او حتي اواخر السبعينات ، بانو بانو للخارقة سعاد حسني و ساعات ساعات لصباح .
مليش اوي في ميادة الحناوي بس مهما يحاولوا يطفوا الشمس الاستنثاء الأوحد عندي.
هشام عباس ، مطرب لطيف بحب ليه زمان و انا صغير كنت بحلم ابقي كبير .
كان في مطرب كمان ارتبط جداً بفرقة رضا ، ايوة هو دة بتاع عجباً لغزال خيال عجباً ، عُمر فتحي .
مليش في الخليجي خالص الا اغنيتن اتغنوا في الحقبة دي ، تصدق و لا احلفلك للعبقري طلال مداحّ و يا طيب القلب وينك لعبد المجيد عبد الله.
يتبقي مين ؟ احب المطربات العرب الي قلبي علي الاطلاق ، الست فيروز و دي كوم لوحدها ، اغنياتها الي بحببهم لا حصر لهم بس في تلاتة they stand out ، بيقولوا صغير بلدي و احكيلي و راجعين يا هوا راجعين ، التلاتة قدام بس بسمعهم طول الوقت .
الكاسيت و نجومه و اغانيه – دي موسيقي الشباب المصري الي كان يستني البومات حميد و فؤش و غيرهم كتير ، يستمر الحنين الي الماضي و انا قولت المرة دي نحّن للماضي سوا ، و نسمعهم سوا، اسمعوهم و غمضوا هتشوفوا شريط عمركم ماشي امام اعينكم.
#انا_مهما_كبرت_صغير