‘ أظلم الأوقات في تاريخ الأمم هى الأوقات التي يؤمن فيها الإنسان بأن الشر هو الطريق الوحيد للخير ‘ ، هي دي الجملة الي بتبتدي بيها رواية تراب الماس الي تحولت لفيلم تم عرضه في دور السينما في ٢٠١٨.
قريت الرواية و من يوم ما قريتها دايماً بترن في وداني هذه الجملة وبشوف صداها و بتعبر عن كتير من المبررات الي بنقولها في الحياة :
‘ احنا بنعمل غلطة صغيرة نصلح بيها غلطات أكبر …’
الرواية حلوة و فيها نطاق زمني واسع بيبتدي من سنة ١٩٥٤ في حارة اليهود في قعدة اصحاب بين حنفي الزهّار تاجر العطور المسلم و الخواجة ليتو الجواهري اليهودي و صديقهم التالت يوسف …سهروا التلاتة مع بعض و كانت اخر سهرة لحنفي الزهّار بس طبعاً مكانش يعرف.
بوفاة حنفي ترك وراه اسرة من سبع افراد اكبرهم حسين ابنه ، بعد ما تقطعت السُبل مع الاسرة اشتغل حسين مع صاحب والده ليتو في تجارة و تلميع الالماس لحد ما قدر يعيل نفسه و اتخرج و اشتغل و اتجوز ناهد الي اصغر منه ب ١٥ سنة و خّلف ابنه الوحيد : طه حسين الزهّار.
حسين سافر و اشتغل في السعودية و حط كل فلوسه في احدي شركات توظيف الأموال و ضاع منه كل تحويشة عمره في اكبر قضية نصب و مطلعش غير بالشقة الي عايش فيها في ميدان ڤيني في الدقي ، بعدها بفترة بيخش يعمل عملية بسيطة ولكن بيصاب بشلل بسبب غلطة طبية . و بكدة بيتحول حسين لراجل قعيد محلتوش حاجة ، مراته سابته بعد ست سنين من الي حصل ، بيقضي يومه في اوضته بيتفرج علي العمارات الي حواليه و يتلصص علي الناس الي فيها بنظارته المعظمة تقريباً طول الوقت ، مفيش غير طه الي عايش معاه و بتيجي عمته فايقة تزوره بشكل مستمر.
بيكبر طه و يتخرج من كلية الصيدلة و يشتغل مندوب مبيعات في شركة ادوية ، حياتة هادئة و رتيبة و نمطية ، بيروح الشغل و يرجع ، يعد مع ابوه شوية و بعدين ينزل ياخد الشفت بتاعه في الصيدلية الي بيشتغل فيها بعد الظهر و يسهر بعدها مع صاحبه ياسر علي القهوة .
فضلت حياة طه كدة لحد ما في يوم ٢٠١٨/١/١ بيرجع طه من شغله يلاقي والده القعيد مقتول و مرمي علي الارض و القاتل لسة موجود و حاول يقتل طه بس نجا بأعجوبة ، و من اللحظة دي بتبدأ قصة كبيرة في حياته و اسرار بيكتشفها واحد ورا واحد…
بيروح طه القسم و يحكي الي حصل للمقدم وليد سلطان المسؤل عن القضية و لكن بتتحفظ لعدم توافر ادلة عن القاتل .
بيصاب طه بحالة من عدم القبول للواقع و بيروح يدور في اوضة والده الي كان بيقضي فيها كل يومه تقريباً و فعلاً بتقع في ايده مذكرات و خواطر والده الي كان بيكتبها من ايام ما كان بيشتغل مع صاحب والده الخواجة ليتو ، و دي اول مرة يتعرف علي تراب الماس ، البودرة التي بيتلمع الألماظ بها، والي استخدمها ليتو قدام حسين علشان يقتل قطة بنته الي كانت مصابة بالسعار ، و علشان تبان و فاة القط عادية حط شوية من البودرة في اكلها و فعلاً بعد شهر ماتت القطة .
و هو بيعمل كدة قال لحسين الصغير تلك الجملة السحرية: ساعات بنعمل غلطة صغيرة علشان نصلح بيها غلطات أكبر.
و من هذه اللحظة زرع الخواجة في عقل الولد الصغير فكرة انتقامية تخلص الشخص من اعدي اعداءه من غير ادني اثر و من غير اي اصابع اتهام تمتد للفاعل و تعذب الضحية عذاب شنيع ملوش وصف.
و هو حسين قعيد ابتدي يوسع دايرة اعدي اعداءه و يمدها لرموز الفساد في البلد و لم يجد افضل من محروس برجاس: رجل الأعمال الموالي للسلطة الي ڤيلته مواجهة للعمارة بتاعة حسين ، و هنا طه بيفتكر واقعة غريبة ابوه عملها و طلب منه في يوم انه يوديه عند محروس برجاس في قصره و يستناه برة و فعلاً حصل و راحله حسين و سههاه و حطله نفحة من البودرة و بعد شهر مات محروس برجاس و لم يستدل علي الفاعل .
طه انهار من الي بيقراه لحد ما و هو بيدعبس في حاجة والده لقي القارورة الي تحوي بودرة ‘ العدالة المتأخرة ‘ الي ابوه كان بيستعملها.
في يوم و هو في الصيدلية جاله و احد من المتعاطين المعروف بال ‘ السرڤيس ‘ شبيح و بلطجي من المنطقة و طلب منه دوا جدول و لما بيرفض طه يصرفه بيضربه و بيهدد صاحب الصيدلية انه هيدكها علي دماغه لو فضل طه فيها ، طه مبيكدبش خبر و بيستدرج السرڤيس عنده و يعمله شاي بالبودرة و بيخلص منه للأبد.
بيفضل طه يتردد علي المقدم وليد سلطان الي ماسك قضية والده و راجل السلطة الي مربط الاحداث ببعض و الجرائم و تشابهها في الملابسات الي بيروح لطه في البيت علي غفلة و يقوله انه عارف قاتل ابوه ، و سبب قتله و هي انه تلصص علي جريمة تودي في داهيه لما شاف سليمان اللورد بيستلم شنطة المخدرات للمنطقة ، كان حسين قاعد بيراقب في الظلمة كالعادة و طه دخل و نوّر النور فجأة فشافوه انه شافهم بيسلموا الممنوعات فبعتوله حد يخلص عليه لانه الشاهد الوحيد عليهم ، و هنا بدا واضحاً ان العقيد وليد دة مش سالك و لا عدل و له ضلع في جريمة قتل حسين و بعد فترة من المراوغة قاله ان السرڤيس خد اوامر انه يخلص علي ابوه فدة الي تم.
بيمشي وليد سلطان و يسيب طه مش مستوعب و حاسس انه في حلقة مفقودة فبيدخل يقلب اوضه ابوه و يجيب عاليها واطيها و يلاقي اچندة مستخبية فوق سرير ابوه فيها باقي السر : الراجل الي بيسلم المخدرات لسليمان اللورد هو وليد سلطان.
و بيعرف طه القصة كلها و يفك شفرتها و يقرر ينتقم و يخطوا علي خطي والده ، في هذه الاثناء حد بيبلغ علي فساد وليد و بيتوقف من شغله فبيقرر ينبش ورا الي عمل كدة وهي احد اكبر مديري شبكة علاقات مثلية بتديرها ظاهرياً سيدة لها نشاط مجتمعي بتجيب رجالة و شباب لممارسة الشذوذ ، اكبر زباينها هو هاني محروس برجاس الي بيقبض وليد علي احد الولاد و بيعترف انه كان معاه و علشان و ليد يعديها طلب رشوة كبيرة و الا هيصعد و هتبقي فضيحة ، و عليه رفضوا الرشوة و قرروا يخلصه منه بشكواه و ايقافه عن العمل .
وليد مبيلاقيش احسن من طه علشان يتفق معاه انه يخلصه من مَن خانوه عن طريق نفس الطريقة الي ابوه اتبعها ، ظاهرياً طه بيوافق و وليد مش عارف ان طه لقي المذكرات السرية و بيعوم علي عومه و خصوصاً ان وليد صور طه جمب السرڤيس و هو مقتول و ماسكها عليه كأداة ضغط.
بتستمر الاحداث و طه معاه البودرة السحرية و بيتخلص من وليد بنفس الطريقة لأسكاته لأبد ، و بتستمر الاحداث و طه بينصب نفسه آخد للحقوق و مندوب للعدل و العدالة المتأخرة في الدنيا و بينقذ جارته سارة و يساعدها ان تتقم من مديرها المذيع اللامع الي اغتصبها و صورها ڤيديو.
الفلم و الرواية حلوين – هم غير بعض في شوية تفاصيل و ملخصي السابق فيه مزيج من الاتنين .
نجي لمربط الفرس: علي قد ما الرواية لها معني عميق ، هي مخيفة !!
كل الي قتلهم حسين و طه بتراب الماس مستحقين للموت اكتر من مرة ، بس هل دة سبب كافي ان حد ينصب نفسه انه قاضي و جلاَد و مندوب لله و العدل ؟
و هل العدالة المتأخرة ( دة لو جت ) السبب ؟ العدالة الي بتبجي متأخر او متجيش خالص بتخّلي الواحد عايش ظلم ، و بتمهد للقهر المتأصل و بتحول كل واحد صاحب مظلمة لقاتل بنية الصح و تخليه يعمل : غلطات صغيرة يصلح بيها غلطات اكبر .
لو انت لقيت تراب الماس هتعمل ايه ؟
هتبقي طه و لا هتبقي ملاك ؟
انصحكم تقروا الرواية و تشوفوا الفيلم – eye opening و بيدوس علي الجرح المظلومين الذين لا تسعفهم العدالة بأظهار العدل في وقته فبياخدوها بدراعهم و هنا يبدأ العبث….
#قرأت_و_شفتلك_تراب_الماس
#Dimond_Dust
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
السبت, أبريل 20, 2024
آخر الاخبار
- فوز فريق الاتحاد السكندرى ٢٠٠٧ على الزمالك بالقاهرة ٢-١
- رحلة لجماهير الثغر.. لمشاهدة لقاء الاتحاد السكندري و الزمالك بإستاد القاهرة
- الاتحاد السكندرى يتصدر الدوري بفارق الأهداف
- حل فزورة فريش اليوم الأحد 21 رمضان.. بلد السكر والقهوة والتبغ في الكاريبي
- بحضور 600 شخص .. نادى السلام البحرى ينظم اكبر مائدة افطار على ضفاف قناة السويس ببورسعيد
- تأجيل مباراة الاتحاد السكندرى و المصرى البورسعيد لتقام يوم الخميس 4 إبريل
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”