أحمد شرف يكتب : مش مجرد شعر

أحمد شرف يكتب : مش مجرد شعر

0

مش مجرد شعر
 
الشعر دايما بيقولوه الموجوعين
وبيوصفو بيه الوجع
وقت الوجع
الشعر اصلا فضفضه
للى اتجرح واللى اتظلم واللى اتخدع
الشعر صرخة موت وممنوع تتسمع
الشعر صوره للمشاعر
بس مكتوبه حروف
ازاى يقولو الشعر جرأه
الشعر حرقه
الشعر خوف
اقرا السطور وافهم معانى اللى اتكتب
تلقى الالم مكتوب
تلقى العذاب وسط الكلام محسوب
بالسنتى والمللى وبالخوف والمحن
وفى الزمن مضروب
الشعر عمره ماكان شوية هلفطه
عمره ماكان حبة جمل متنظمه
الشعر أصلا مظلمه
شكوة ضعيف ضاقت عليه كل السبل
فضفض كلام ودموع وحبة همهمه
الشعر أصلا مظلمه
متقسمه فيه الجمل
ظلموك يا شعرى وقالو دا مجرد كلام
قولت السلام
مضطر اسكت مش هدافع مش هبرر
مش هقدر اشرح ولا اعيد ليهم واكرر
لكن حرام
طبعا حرام يقروك مجرد م المعانى
يقروك اغانى
يقروك قصص متألفه تأليف
ويشوفو احساس اللى كاتبك زيف
ومايفهموش معناك
ومايشوفوش اللى بيبكى هناك
وصوته مدبوح م الصراخ
ويقولو إن انتا يادوب تخريف
حقك عليا بس هنقول ايه
مين يفهمك ويحس نارك مين
ومادامو سطحيين
فضفض ياشعرى وقول وغنى وبوح
وابكى عليا ونوح
لو حتى قالو إننا مجانين
إياك تبطل تحكى احساسى
دانا مش بهون حرقتى غير بيك
دانا وانتا متصاحبين
دانا وانتا متعاهدين دايما نصبر بعض
وبيننا عهد انا وانتا متفقين
هحفر بايدى وبيك وهرمى بدور
وهروى بيك زرعتى لو حتى ارضنا بور
جايز فى يوم تطرح
واللى مفهموش الحروف
واللى شافوها بس كدب وزور
بكره هتحمى شمسهم ويجوك
بكره هيفتكروك
ويشوفو أوراقك نعيم الضل
بكره يجوك الكل
يقروك بقلب وعين وروح وضمير
بكره يفوقو كتير
واللى نكر هيقِرّ
ويقولو انك مش مجرد هلفطه
منتاش جمل مترتبه ومتظبطه
ويقولو انك صوره ليا وصوت
ويقولو انك مش مجرد شعر

اترك تعليق

يرجي التسجيل لترك تعليقك

شكرا للتعليق