محمود نعمة الله يكتب : آخر شوية صبر

محمود نعمة الله يكتب : آخر شوية صبر

0
آخر شوية صبر
 
آخر شويّة شاى كانوا معايا
ماعرفش ليه حسّيت بحلاوتهُم
ولقيتني فجأه بقول لنفسي واعيد
كان يجرى إيه لو كنت خلّيتهُم ,,
آخر شويّة صبر خبّيتهُم
علشان يعينوا القلب عَ الأيام
خِلصوا ف مكالمَه طويله بتقطّع
كُل اللّى فاكرُه من المكالمه ,, سلام ,,
آخر لُقا من عين حبيبتى زمان
كان زي النور الشمس للمسجون
طَلّت عليه الشّمس مِ الشبابيك
قام بَصّ ليها بلهفه كالمجنون ,,
كان قلبي أوسع مِن براح الكون
يفرِش بناس ,, يرتاحوا أحياناً
يفرش لناس ,, يرتاح وأحياناً
يتعَب إذا لم يأتى نحوه زبون ,,
كان قلبي عارف إنّه هيفارق
وانا كنت عارف إنُّه مِش مضمون ,,
زيِّك تمام ,, كان قلبي مِش ثابت
غاوي السفر والغُربه بردُه ساعات
لفّيت وجيت ولقيتني مِش جنبِك
مين اللّى قال الغُربه بالمسافات ,,
آخر شويّه من الحنين بالذات
إتسرسِبوا من قلبي وانا بجري
مع إنّي قافِل قلبي والله ِ ,,
حَظِّك بقى معلش يا حبيبتي
كُلّ اللي جيبته معايا علشانِك
خطفُه الزمن من قلبي وانا ساهى ,,
بصّيت عليا من المرايه لقيت
كُل اللى فاضل فيّا مش شبهي
وكإني شخص بينقرض بالوقت ,,
بصيت عليا من المرايه بكيت
عاجبِك كده ,, مبسوطه يا حبيبتى ؟
كُل الدموع دى ذنب مين دلوقت ؟!
آخر وعود كان يجرى إيه تفضَل
وتكوني جنبي بِتصنعي الأحداث
قلبي اللّي جايب ذنبُه على غيرُه
زي العبيط.. عمّال يوقّع ناس

اترك تعليق

يرجي التسجيل لترك تعليقك

شكرا للتعليق