أخبارك ايه ؟!
أنا عادي يعني وعادي جداً
مش تمام
والصمت سايد جوه روحي ودمعى خام
والشعر لعنه وخدني ف السكه الغلط
كل الصور والتشبيهات حتى الحروف
صابها المرض
أما الجسد
أصبح بينزف وحده ويعاتب ف شوق
طب نفسك ايه ؟!
أنا نفسي افوق
نفسي اما ادوق الجي فيا استطعمه
نفسى افهمه
نفسي انى الم الماضي واقدر وافرمه
مش هرحمه
قلبي اللي دايماً يزرع الحب بغشم
نفسي ان ابطل خلق
أو ابطل عشم
لَيه يِتوشَم عَلى رَوحِي وِجبينِي الفُراق
وِالعِلَّه حُب ؟!..
لَيه دِايماً القىٰ فِـ سِكِّتي مِليون مَطبّ
لَيه اللِي طَبّ فِـ كَفِّتي
” يِقتلنِي بُعد ”
كان وعد بينا وكان ضروري زيي يوفي
كان حقه يشفي
مش ف قلبي يكون مرض
كل اللي قرب مني
قربلي لغرض !!..
مش بعترض على وهم عيشته وخوف كسرني
ولا حتي بعتب ع الزمن ولا دمع زارني
انا بس بحزن على اللي شيلته ف قلبي ليهم
والقسوه فيهم تبقى رد الطيبه مني
خيبت ظني يا حُب ، فعلاً بعترفلك
بعلن غبائي وضعف روحي وبنكشفلك
مابقتش هقدر إني اداري الجرح فيا
ولا حتي هقدر إني اكمل بيك ، آسفلك
طِفلَك كِبر مِن كُتر مَـ اتوجَّع وِعيَّط
دِبلِت مَشاعرُه وِ جَف شِعرُه وِحُزنُه يِشهَد
إِن اللِي بَاقِي فِـ رَوحُه فُرقَه وِمَاضِي خَايِب
شَعّبَط خَيالُه بِحَبل وَهم وِِشدُّه لَكِن
بَانِت حَقيقتُه قُصاد عِيونُه وِشَافُه دَايِب
يِمكِن سَاعتهَا وِبَس أَدرَك للِي فِيهَا
الدُنيَا كُوتشِينِة وَجَع وِنصيبُه شَايِب ..
#مُصطفَى_شـَاهيِن