نبيل سلطان يكتب : الموت تجارة الأحياء

0

دفعتني تجربة سابقة لدخول عالم الموتى عن طريق احتياجى فى عملى لنوع معين من التنجيد بالخوص للكراسى القديمة البمبوطية لا يوجد فى القاهرة الا فى المقابر المواجهة لمنطقة وقعت صخرة من الجبل على ساكنيها من عشرون عام وهذا لان هذا النوع من العمالة المحترفة يسكن هذة المقابر منذ عشرون او خمسة وعشرون عام ..
وبالفعل ذهبت إلى هناك وجلست داخل حوش من الاحواش الكبيرة فى مقابر فى وسط العاصمة وهالنى هناك ما رأيت على مدار يومين اتردد على هذا المكان المزدحم بالمتناقدات واليكم بعض مما رأيت ..
كانت الواحدة ظهرا مع عم خليل الذى يتخذ من هذا الحوش نصفة مكان لعملة والنصف الداخلى سكن لعائلتة المكونة من زوجة وثلاث ذكور وانتى هى الوحيدة التى تدرس فى الجامعة كلية تجارة والشباب يعمل منهم اثنان فى صنعة ابيهم والثالث يعمل سائق توكتوك …
اليكم وصف للمكان ، حوش كبير بة غرفتان بكل غرفة مدفن يفصلهم ساحة كانت سابقا بلا سقف والان بها سقف من الخرسانة ؟؟ حكى لى عم خليل انة تم صبة يوم تولى مرسى الحكم وايضا بنى حمام ومطبخ وقام بتوصيل الصرف لبالوعة الشارع العمومى الغريب ان الحوش بة مياة وكهرباء بعدادات حكومية وايصالات سليمة عليها رسوم نظافة ؟؟
يعنى بيت مكتمل داخل المقابر وحينما سألت عم خليل عن ملكيتة للمكان امتعض وادار وجة لى قائلا يا بية انا عايش هنا من عشرين سنة ومحدش سالنى انت مين و معايا وصل نور وميه …. ؟؟
المهم ذهبت فى اليوم الأول وانا احاول الاجابة عن سؤال صعب وهو مدى قانونية ذلك ويبدوا أن هذا السؤال كان سؤال اكثر سزاجة مما كنت اظن فالاتى لا يحكمة اى قانون ….
عدت فى اليوم التالى وانا اومنى نفسى بالبدء فى شغلى مع عم خليل وانهاء هذة العملية سريعا وقررت أن اجلس مع الرجل للتأكد من الشروع فى البدء فى طلبى ..
وحينما وصلت استقبلنى الرجل بابتسامة ترحيب واجلسنى بجوارة وطلب لى قهوة من رجل يتخذ سور فاصل بين حوشين مقرا لنصبة الشاى والقهوة وبدأ عم خليل فى الحكايات دون أن أطلب او أسأل اى سؤال …. وهالنى ما سمعت واليكم التفاصيل ??
وسأروى القصة بنفس لغة الراوى الاصلى .. عم خليل .
انت عارف يا هندسة حكاية العيال اللى لقوهم مقطعين النهاردة احنا هنا بنلاقيهم بقالنا سنتين والتوربية بلغوا الحكومة فى الاول
كام حادثة اهتمت وبعد كدة لما الموضوع اتكرر قالوا للتوربية ماتوجعوش دماغنا مافيش حد عامل بلاغات اختفاء اتصرفوا انتوا فى الجثث وخلصونا اصل العيال دى يا بية كلها عيال صغيرة من ٧ الى ١٢ سنة كلها عيال هربانة من اهاليها او مالهاش اهل اصلا وبيعملوا كل الحاجات الحرام .
دة من كام يوم كان فى عيل بيبيع استروكس ولا فوتو يقصد فودو لواحدة ست فى عربية فخامة قامت خدتة معاها واختفى من ساعتها ومحدش شافة عيال بنت حرام يا بية …… سألت باستغراب فودو واستروكس هنا وبيبعهم عيل ١٢ سنة ؟؟
ايوة يا بية كل حاجة موجودة هنا من اول البانجو والحشيش والبودرة والنسوان ولحد جتت الميتين وحتت منهم والعيال الصغيرة كلة كلة موجود … رديت ازاى يا عم خليل فهمنى قالى يا بية التجارة هنا اصلا من زمان تجارة جثث التوربية دول كلهم تجار جثث وتجار أعضاء وجيل بيسلم جيل وبعدين بقى العيال الشباب الجداد بيعملوا مصالح على جنب مع الزباين .. طب هاقولك حاجة كل زباين المكان هنا عليوى قوى وعربيات من أفخر الأنواع احنا هنا يا بية بنشوف العجب ستات حلوة وشباب زى الفل وبهوات وبشوات …☠☠
قولتلة زى اية احكيلى سمعت عن فلان الفلاني قلتلة لا الحقيقة اصل انا اصلا مش من هنا .. قالى دة يا سيدى صاحب معرض العربيات الكبير اللى الناحية التانية قولتلة تمام قالى لما جيت انا هنا من عشرين سنة كان بيساعد ابوة التوربى …..قولتلة تمام امال عمل اية عشان يبقى كدة ؟؟ قالى ابوة الله يرحمة كان بيخاف ربنا وبعد لما ابوة كبر الواد اشتغل على بيع الجثث للعيال بتوع الكليات وبعد كدة سمعت انة كان بيبيع لهم برشام وحشيش ولو مرة وبعد كدة بقى معاة ناس كتير بتشتغل اما فى الحشيش او فى البودرة ووسع النشاط كمان ما اصل الواد دة من صغرة كان بيبيع بانجو من ورا ابوة ،،.
دة غير بقى فى الاخر بقى عندة دولاب عيال ؟؟ ….
انا يعنى اية دولاب عيال .؟؟.
يعنى يا بية بيجيب العيال من تحت الكبارى ومن الخرابات يعلمهم بيع المناديل والفوط فى الإشارات وبعد كدة يطمع العيل من دول لغاية ما يشغلة اما فى المخدرات او العيل يختفى ومنعرفش راح فين …..،،
يا بية هنا فى كل حاجة شمال انت عاوزها فى عربيات عليوى قوى بتيجى تاخد الحتت فى صندوق الثلج وتدفع وتمشى وكل الزباين دكاترة كبار وفى عمليات بتتعمل جوة الترب هنا والعيال بتتاوى جنب اى ميت ولا من شاف ولا من درى ومحدش بيسأل هنا تجار موت يابية ولولا انى بخاف ربنا كنت اشتغلت انا وولادى فيها الناس بتخرج من هنا حاجة تانية يا بية بس احنا بنخاف ربنا ..
وكل دة يابية الحكومة عارفاة واما مطنشين واما مقسمين مع التجار اطلب لك شاى يا هندسة …….شكرااا جدا يا عم خليل وقمت مزهول مما سمعت عن ما يحدث فى مكان فى قلب القاهرة .
ومستغربين من ٣ جثث لأطفال بلا أعضاء
اتارى الموضوع قديم وكبير
وطبعا عم خليل حكالى حاجات اكتر ماينفعش تتكتب عشان نفضل عايشين على امل اننا هانعيش ونموت من غير ما نتباع قطع ..
وربنا يستر
التوقيع
مواطن

اترك تعليق

يرجي التسجيل لترك تعليقك

شكرا للتعليق