كل التهانى صور متكرره
مشاعر باهته ومزوره
زى ما بيقولوا في المثل
اهو بروّ عتب !
والعتب مش عتب البيوت
العتب ياحبيبتى
لما الكلام بيموت
زى مصاصة القصب
بعد العصير مافيهاش
ولا نقطة عسل !
يبقى الكلام ماسخ
كل سنه وانت طيب بمناسبة مولد النبى
لا والنبى ؟؟!!!
كسلتى حتى تكتبيها بالحروف
واكتفيتى بصوره بهته
زى بهتان الظروف
صور كتير متكرره
بعتها سعد من اخر الصعيد
وبعتها سامى م المندره
كل واحد عملها شير
كأنه عبى الشوال بخير
كله كرر نفس الحكايه
والمهزله !!
عادل حراز